灰到核爆！香港窮人淒涼自白：香港男人的生理期

可能有d長，希望大家聽下我講兩句…

好不幸，我係一個男性，仲要生係香港。
上有高堂，雖未有妻房，但有一多年女友。

屋企唔係咩小康之家，應該連普通都稱唔上。
每每只係不斷入不敷支咁日復日，月復月咁捱。

細細個，我已經知道要努力讀書。
點解要努力讀書，
我知。係因為要搵更多錢，去改善生活。

中小學，係人生過得最精彩最開心既時間，
呢個係真。面對既只係讀書，其餘只係好開心咁玩。

同時，我亦悟出我唔係讀書既材料。
我好喜歡去學習唔同既知識，只係無辦法克服到香港既教學制度。

唔好講中學畢業講副學士，香港地連大學畢業一街都係。

為左每個月多二千既起薪點。
就係咁，每季每個月都係到還緊政府六位數字既款項。

當然，好多人靠知識脫貧，好成功好勵志。
但同時，更多既人係失敗，一直係貧窮既旋渦打轉。

我好愛我女朋友。
讀書既時候，可以m記一餐，坐公園一日就快快樂樂。
佢從來無任何恕言。

好誠實，望住身邊人。
每個男人都想比佢一個幸福既家。

每個人都想生活過得好，
唔係結婚就要買樓，係無樓無可能生活到。

公屋申請有排等，首期更加唔好諗。
六合彩先係香港人最有可能買樓脫貧既方法。

望住一座座既高樓大廈，金融之都。
除左專業人士，地產，倫敦金。
社會根本容不下我們存在。

地產傳單既樓盤好似唔洗錢。
780，465，388，你唔好話後面有個萬字。
就算只係780，465，388蚊，望下銀包都唔會有。

工作上，所有中至上既位置都係四十歲至六十歲既人。
一係你等佢退休，一係你等到四十歲。

社會話年輕人唔願意努力唔願意捱，係廢青。
唔係未試過捱，每日做足12個小時換黎既只係應份兩個字。

每日只係搭車來回，已經用上兩小時。
口中一邊想港鐵收檔，但自己每日就繼續逼地鐵。
係因為除左地鐵外，無交通工具負擔到。

食飯，更加唔洗講啦。
好多社會高地既人會講，一個m記22蚊姐，有幾貴。
講就輕鬆，你估未試過一星期三餐m記。

每個月都入不敷支，租金交通食飯家用，有邊樣唔係錢。
我唔係要儲錢買金炒股，只係想普通咁生活。

香港人可以有咩興趣。
創意？咪玩啦，創意留返諗地產個四字成語啦。

睇波，個幾百蚊台費都比唔起。
音樂，咪玩啦邊有錢。
運動唔洗錢啦？
係呀，放工仲邊有時間。

香港地恍惚就為大陸人而設。
比佢地運水貨，炒樓，
連生活必需品都炒到越來越難負擔。

香港地寧願死都唔好病，除非有多餘錢去睇醫生。
應該係連死都唔好，骨灰你有錢放嗎？

當教育教簡體字，社會無民主，我完全明白問題係邊。

但我無資格去爭取，
每日只係諗點交費用，手停口停，全家食甚麼。

可能係香港，女人會更加好。
最少有得選擇家境好小小既男人。
當然，女人亦有其他煩惱，唔係以偏概全。

男人，好多都無父幹無得選擇。

我唔洗夢想，唔需要理想。
我只係想好好可以同家人，另一半開開心心生活。

移民？有咁多錢，我就買左屏風樓un un腳炒股。

有人話世界好多人慘過你，我明白。
但確實我認為咁比無意思，我無辦法講我生活得好幸福。

由細到大，老師話香港係福地，
先進又無天災，話香港人好幸福。

香港的確無天災，但面對既問題比天災更令人唏噓。

有人話女人生理期個幾日好辛苦好煩惱，呢個我明白。

但香港地男人既生理期係一世，
當然女人亦面對好多問題，我只係舉例。

細個我諗，點解咁容易放棄生命，
關關難過關關過，實有出路。
到大個，我終於明白，
生存係香港真係要好勇敢，死亡真係每日離得好近。

但望望兩老同身邊人，
你知道必需走下去，捱下去。

世界好美好，只係作為窮人，香港唔美好。
如果有得選擇，我唔想係香港人，唔想係香港生活。

香港窮人上。

看更多

下一頁

香港公司百科: 家居 親子 進修 美容 結婚 愛情 旅遊 音樂 網站 電腦 寵物 設計 飲食 送禮 商業 貸款 汽車 健康 運動

重要聲明：本網站是以即時上載留言的方式運作，Hothk.com網站對所有留言的真實性、完整性及立場等，不負任何法律責任。而一切留言之言論只代表留言者個人意見，並非本網站之立場，讀者及用戶不應信賴內容，並應自行判斷內容之真實性。於有關情形下，讀者及用戶應尋求專業意見(如涉及醫療、法律或投資等問題)。 由於本網站受到「即時上載留言」運作方式所規限，故不能完全監察所有留言，若讀者及用戶發現有留言出現問題，請聯絡我們。Hothk.com網站有權刪除任何留言及拒絕任何人士上載留言 (刪除前或不會作事先警告及通知 )，同時亦有不刪除留言的權利，如有任何爭議，管理員擁有最終的詮釋權。用戶切勿撰寫粗言穢語、誹謗、渲染色情暴力或人身攻擊的言論，敬請自律。本網站保留一切法律權利。